Radiomut/maligaasanut ukiumoortumik akiliut e-Boksikkut nassiunneqarput.
Radiomut/maligaasanut ukiumoortumik akiliut e-Boksikkut nassiunneqarput.
Qitiusumik Naatsorsuuserisoqarfiup ukiumoortumik akiliut radiomut/maligaasanut siullermeersumik e-Boksikkut nassiuppaa.
Qitiusumik Naatsorsuuserisoqarfiup, ukiumoortumik radiomut/maligaasanut akileeqqusissut, piffissami 01.01-imiit 31.12 ilanngullugu atuuttoq nassiuppaa. Taanna kingusinnerpaamik 03.07 2023 akilerneqareersimassaaq.
Nets-ikkut akilersuinermut isumaqatigiissuteqareeruit, akiligassannut tunngasut allannguuteqassanngillat.
Nets-ikkut isumaqatigiissuteqanngikkuit, akiligassaq e-Boks-ikkut tigussavat. e-Boks-eqartussaanngitsutut nalunaarsorneqarsimaguit allakkanik Allakkerivikkut nassinneqassaatit.
Malugiuk
Ukiumoortumik akiliut radiomut/maligaasanut akileeqqusissut piffissaq eqqorlugu akiliisimanngikkuit, Akiliisitsiniartarfiup akiliinissamut tuavisaarummik nassissavaatit.
e-Boks sunaava?
Innutaasut suliffeqarfiillu pisortanut oqartussaniit 2017-imi atuutilersumik, digitalimik allagarsisalernissaannut periarfissaliisumik, Pisortani Digitalimik Allakkerineq pillugu, inatsisartunit akuerineqarpoq.
e-Boksi tassaavoq internetsikkut digitalimik allakkerineq, tassanilu digitalimik allakkat pisortatut oqartussaasuneersut pingaarutillit ataatsimut isumannaatsumik katersorneqartarput. e-Boksi sumiikkaluaraanniluunniit atorneqarsinnaavoq taamaalilluni qarasaasiaqaraanni, tabletseqaraanni imaluunniit angallattakkamik oqarasuaateqaraanni atorneqarsinnaalluni.
e-Boksip atornera akeqanngilaq aamma e-Boksimik qanoq annertutigisumik atuisoqarsinnaanera killeqartinneqanngilaq.
NemID/MitID
e-Boksimut iserniaraanni NemID aamma MitID suli tamarmik atorneqarsinnaapput.
NemID tassaavoq imminut sullinniarluni, pisortanut namminerlu inuttut, atorfissanut isertaat isumannaatsoq. NemID/MitID atorlugu atuisutut ilisarnaatit (bruger-id) isertaatillu assigiit atorneqartarput, tassa soorlu netbankimut, pisortat nittartagaannut aamma nammineq inuttut atuiffiusunut internetsimiittunut.
NemID/MitID atorlugu iserniaraanni atuisutut ilisarnaat (bruger-id) toortaqqaassaaq taavalu isertaat toortarneqassalluni. Tamatuma kingorna nøglekortimiit kode-q imaluunniit NemID/MitID app-eq atorlugu akuersissut toortarneqassaaq.
Atuisussaatitaajunnaarnissamut periarfissaq
Kalaallit Nunaanni innuttaasut 15-ileereersimasut tamarmik suliffeqarfiillu Kalaallit Nunaanni CVR-imut nalunaarsorsimasut tamarmik, digitalimik allakkerivimmik atuinissaminnut pisussaaffeqarput, taannami atorlugu pisortatut oqartussaasunit allagarsiassanik digitaliusunik pissarsisarnissamut periarfissaammat. Taamaattorli immikkut ittumik inissisimagaanni atuisussaajunnaarnissamut periarfissaqarpoq.
Innuttaasut taamatut inissisimasut kommunerisaminni Innuttaasunik Kiffartuussivimmut ornigullutik saaffiginninnermikkut Digitalimik Allakkerisarnermit atuisuujunnaarsitaanissaminnut qinnuteqarsinnaapput. Innuttaasut suliffeqarfiillu atuisussaajunnaarniarunik tamanna arlalinnik piumasaqaatitaqarpoq, tamakku pillugit kommunerisannut saaffiginninnikkut paasiniaaffigisinnaavatit.